Lənkəranda “OBA” marketlər şəbəkəsi “Xəyalların izində...” sosial məsuliyyət layihəsini uşaqlara təqdim edib. Bu haqda məlumatı Cenublu.az bu gün, 20 iyul tarixində APA-ya istinadən verir.
Layihə Lənkəran şəhərinin mərkəzində Güvən Xeyriyyə İctimai Birliyinin və Lənkəran Şəhər İcra Hakimiyyətinin dəstəyi ilə həyata keçirilib.
Bildirilir ki, tədbirdə 70-dən çox uşaq, həmçinin xüsusi qayğıya ehtiyacı olan və “OBA” marketlər şəbəkəsinin Lənkəran şəhərində yaşayan əməkdaşlarının övladları da yer alıblar.
Uşaqlar əvvəlcə müxtəlif yarışmalarda iştirak ediblər, sonra isə açıq havada film izləyiblər. Onlar üçün Bakıdan dəvət olunmuş peşəkar aşpazlar səyyar qida maşınında bir-birindən maraqlı fastfudlar hazırlayıblar.
“OBA” marketlər şəbəkəsi layihənin əsas məqsədini belə izah edib:
“Təəssüf ki, bəzi regionlarımızda olsa da, bir çox bölgələrimizdə kinoteatr, fastfud və əyləncə məkanları mövcud deyil. Uşaqlar isə hər zaman bu aktivliklərə maraqlıdırlar. Yəqin ki, bu, bir çox uşaq üçün əlçatmaz arzu qismindədir. “OBA” marketlər şəbəkəsi olaraq “Xəyalların izində...” layihəsi ilə onların kiçik arzularını reallaşdırmağa çalışırıq. Layihəmiz yeni tədris ili başlayana qədər davam edəcək”.
Tədbirin sonunda iştrakçılara “OBA” marketlər şəbəkəsi tərəfindən hazırlanan hədiyyələr təqdim olunub.
