***
Sosial şəbəkələrdə azyaşlı qızın bioloji anası tərəfindən qaçırılması və saxlanması ilə bağlı yayılan iddialar araşdırılıb.
DİN-in mətbuat xidmətinin Lənkəran regional qrupunun baş inspektoru, polis kapitanı Məhəmməd Rzayevdən verilən məlumata görə, azyaşlı Yetkinlik Yaşına Çatmayanların İşləri və Onların Hüquqlarının Müdafiəsi Komissiyasının əməkdaşları və psixoloqun iştirakı ilə verdiyi izahatda könüllü şəkildə bioloji anasının yanına getdiyini, onu övladlığa götürən T.Əliyevanın yanına qayıtmaq istəmədiyini bildirib.
Araşdırmalar zamanı əməldə kriminal tərkibin olmadığı aşkarlanıb.
Toplanmış material baxılması üçün aidiyyəti üzrə Yetkinlik Yaşına Çatmayanların İşləri və Onların Hüquqlarının Müdafiəsi Komissiyasına göndərilib.
***
Lənkəranda övladlığa götürülən 15 yaşlı qızın bioloji anası tərəfindən qaçırıldığı bildirilir. Bu haqda məlumatı Cenublu.az bu gün, 4 sentyabr tarixində verir.
Azərbaycan Uşaqlar Birliyinin sədri Kəmalə Ağazadə bildirib ki, 15 yaşlı qızı bioloji ana və qohumları qaçırıblar və uşaq rəsmi anaya dönmək istəmir. Qonşuların sözlərinə görə, yeniyetmə bioloji ana tərəfindən məcburən saxlanılır və təzyiq altında “getmirəm” deyir.
Qeyd edək ki, bioloji ana Lənkəranda illər əvvəl notarial qaydada uşaqdan imtina edib və övladlığa verilmə prosesi məhkəmə yolu ilə həyata keçirilib.
