Lənkəran Olimpiya İdman Kompleksində gənc vikipediyaçılar üçün yay düşərgəsi keçirilib. Bu haqda məlumatı Cenublu.az bu gün, 11 avqust tarixində verir.
Düşərgənin məqsədi gənclərin milli-mənəvi dəyərləri daha dərindən mənimsəməsi, yeni bilik və bacarıqlar əldə etməsinə dəstək vermək, eləcə də asudə vaxtlarını səmərəli keçirmələrini təmin etməklə yanaşı, "Vikipediya"ya yeni istifadəçilər cəlb etmək, təcrübəli istifadəçilərin bacarıqlarını daha da təkmilləşdirmək olub.
4 gün davam edən düşərgədə gənclər dəvət edilən "Vikipediya" inzibatçıları və peşəkar istifadəçilər tərəfindən müxtəlif "Vikimedia" layihələri üzrə təlim və seminarlar vasitəsi ilə "Vikipediya", "Vikiverilənlər", "Vikianbar" və s. mövzular üzrə biliklər əldə ediblər.
Qeyd edək ki, düşərgə Gənclər və İdman Nazirliyinin və azərbaycandilli "Vikipediya"da fəaliyyət göstərən "Azərbaycan vikimediaçıları" istifadəçi qrupunun təşkilatçılığı ilə baş tutub.
