“Lənkəran - Gənclər Paytaxtı 2024” çərçivəsində “Erkən nikah və qohumlar arasında nikahın fəsadları” mövzusunda maarifləndirici tədbir keçirilib. Bu haqda məlumatı Cenublu.az bu gün, 10 aprel tarixində verir.
Tədbirdə erkən yaşda, eləcə də qohumlar arasında bağlanmış nikahların fəsadlarının ictimaiyyətə çatdırılması və yetişməkdə olan gənc nəslin bu haqda maarifləndirilməsinin zəruriliyi vurğulanıb.
Tədbirdə çıxış edənlər erkən nikahların yeniyetmə qızların təhsildən yayınması və onların hüquqlarının pozulması ilə müşahidə edildiyini bildirərək, bu faktları aradan qaldırmaq üçün dövlət orqanları kimi, ictimaiyyətin də üzərinə böyük vəzifələr düşdüyünü qeyd ediblər.
Tədbirdə mövzu ilə əlaqədar videoçarxlar nümayiş olunub, kollec tələbələrinin ifasında hazırlanan erkən nikah və məişət zorakılığı, ailədaxili münasibətləri əks etdirən səhnəciklər göstərilib.
Qeyd edək ki, tədbir Lənkəran-Astara Regional Gənclər və İdman İdarəsi və Lənkəran Dövlət Universitetinin nəzdindəki Sosial və Aqrar-Texnoloji Kollecin birgə təşkilatçılığı ilə baş tutub.
