Lənkəran rayonunun Viravul, Daştatük, Girdəni, Separadi kəndlərində və Gərmətük qəsəbəsində elektrik şəbəkəsi üzrə yenidənqurma işləri həyata keçirilir. Bu haqda məlumatı Cenublu.az bu gün, 30 mart tarixində AzTV Xəbər-ə istinadən verir.
Elektrik təsərrüfatının bərpası işləri 2500-ə yaxın abonent olmaqla 4 min sakini əhatə edir. Belə ki, Viravul kəndində 500-dən artıq dayaq dəyişdirilib. Hazırda isə sovet dövründən qalmış naqillərin yerinə müasir izolyasiyalı yeni SİP kabelləri çəkilir. Ümumilikdə kənddə 1800 ədəd dayağın, 30 min metrdən yuxarı yeni nəsil SİP kabellərinin quraşdırılması planlaşdırılır.
Əlavə olaraq, bərpa işləri çərçivəsində yeni transformator məntəqələri də inşa olunur. Bu işlər Gərmətük qəsəbəsi, Daştatük və Girdəni kəndlərini də əhatə edir.
Həmçinin vətəndaşların həyətlərində olan sayğaclar da yeniləri ilə əvəz ediləcək. Bu sayğaclar həyətdə deyil, həyətdən kənarda, yəni çöl hissədə qoyulacaq.
Yaxın zamanlarda isə şəhər mərkəzində yüksək gərginlikli xətlərin yeniləri ilə əvəz olunmasına start veriləcək. 53.400 abonentin olduğu Lənkəranda 2015-ci ildə 30 kənddə kabelləşmə işlərinə başlanılıb. Bunlardan artıq 17-si tam, 8-i qismən kabelləşdirilib.
