Lənkəran rayonunun İstisu qəsəbəsində Lənkəranla ABŞ-nin Monterey şəhəri arasında qardaşlaşmış şəhərlər çərçivəsində salınmış “Dostluq Parkı”nın açılışı baş tutub. Bu haqda məlumatı Cenublu.az bu gün, 1 avqust tarixində xəbər verir.
Açılışda Lənkəran Şəhər İcra Hakimiyyətinin (ŞİH) başçısı Taleh Qaraşov, Lənkəran-Monterey Dostluq Assosiasiyasının həmsədri Nensi Selfric və Azərbaycanın Los-Anceles şəhərindəki baş konsulu Ramin Qurbanov yer alıblar.
2011-ci ildən qardaşlaşan Lənkəran və Monterey şəhərləri ötən müddət ərzində daim qarşılıqlı əlaqədə olub. Yeni salınan parkda gələcəkdə Monterey günlərinin baş tutması təklif olunub.
Ölkəmizin Los-Ancelesdəki baş konsulu Ramin Qurbanov qardaşlaşan Lənkəran və Monterey şəhərlərinin əlaqələrin davamlılığı və inkişafı baxımından nümunə təşkil etdiyini bildirib.
Ramin Qurbanov Vətən müharibəsindən sonra erməni diasporunun Montereydə daha fəallaşdığını bildirib və bu baxımdan Lənkəranla Monterey şəhərləri arasındakı münasibətlərin inkişafının daha da genişlənməsinin vacibliyini vurğulayıb.
Baş konsulun sözlərinə görə, şəhərlər arasındakı qarşılıqlı əlaqələrin inkişafı və toplumlar arasındakı yaxınlaşma Azərbaycan diasporunun fəaliyyətinə müsbət təsir göstərir.
Xatırladaq ki, İstisu qəsəbəsində 5 ha ərazidə salınan Dostluq Parkı iki hissədən – göl və bağdan ibarətdir. Tikintisinə 2022-ci ildən başlanılan parkın birinci hissəsinin inşası başa çatıb.
Sonda tədbir iştirakçıları yeni salınan gölə balıq buraxıblar.
