Lənkəran rayonu üzrə təhsil sektorunun əməkdaşları üçün 8 Mart – Beynəlxalq Qadınlar Günü münasibətilə tədbir keçirilib. Bu haqda məlumatı Cenublu.az bu gün, 8 mart tarixində verir.
Lənkəran rayonu S.Əliyev adına Haftoni qəsəbə tam orta məktəbində keçirilən tədbirdə Lənkəran-Astara Regional Təhsil İdarəsinin müdiri Bəhruz Mehdiyev bütün qadınları təbrik edib. O, çıxışı zamanı Azərbaycan qadınının keçdiyi inkişaf yolundan və qadınların cəmiyyətdəki rolunun əvəzedilməz olduğundan danışıb. Bəhruz Mehdiyev Lənkəran rayonu üzrə məktəbəqədər və ümumi təhsil müəssisələrində çalışan şəhid ailə üzvü olan xanımları səhnəyə dəvət edərək onlara ehtiramını və təbrikini çatdırıb.
Sonra çıxış üçün söz Lənkəran rayonu üzrə təhsil sektorunun müdiri Elman Rzayevə verilib. O da öz növbəsində qadınları əlamətdar gün münasibətilə təbrik edib. Bildirilib ki, qadınlar nə qədər sevinirlərsə, xoşbəxtdirlərsə, həyatımız bir o qədər mənalı, dəyərli olur.
Tədbirin bədii hissəsində Haftoni qəsəbə tam orta məktəbi şagirdlərinin ifalarında müxtəlif yaddaqalan ədəbi-bədii kompozisiyalar bayram ab-havası yaradıb, tədbir iştirakçılarının alqışları ilə müşayiət olunub.
