Lənkəranda külək iri gövdəli ağacı magistral yola aşırıb, nəticədə 850 abonentin elektrik təchizatı dayanıb.
Cenublu.az xəbər verir ki, bu səhər Lənkəranda güclü külək Lənkəran-Boradigah-Masallı magistralının Vilvan kəndi ərazisində ağacı yola aşırıb. Nəticədə kəndin elektrik təsərrüfatına ciddi ziyan dəyib. 850 abonent işıqsız qalıb. Sakinlər deyir ki, ağacın bir gün aşıb ziyan vuracağı barədə dəfələrlə aidiyyəti üzrə müraciət olunub. Buna baxmayaraq heç bir tədbir görülməyib. Onların sözlərinə görə, Novruz bayramı qabağı evlərdə bayram çörəkləri bişirilir, yeməklər hazırlanır. İşıq olmadığından çörəklər elektrik sobalarında qalıb.
Artıq əraziyə aidiyyəti qurumlar cəlb olunub. Ağacın magistral yoldan götürülməsi və kəndin elektrik enerjisinin bərpası üçün işlər aparılır.
Qeyd edək ki, hazırda rayon ərazisində külək səngiyib. Günəşli hava müşahidə olunur.
