Həkimlər və televiziya aparıcıları adından istifadə edərək dələduzluq edən Lənkəran sakini polis əməkdaşları tərəfindən saxlanılıb. Bu haqda məlumatı Cenublu.az bu gün, 27 iyul tarixində verir.
Belə ki, sosial şəbəkələrdə səhifələri olan həkimlər və televiziya aparıcıları adından istifadə edərək onların dostluğunda olan şəxslərə qarşı dələduzluq edən şəxsin Lənkəran şəhər sakini Kəlbihüseyn Abuşov olduğu müəyyən olub. O, ifadəsində sosial şəbəkələrdə həkimlərin və aparıcıların adından istifadə etdiyini və onların tanışlarının etibarından sui-istifadə edərək müxtəlif məbləğlərdə pul vəsaitləri aldığını bildirib.
Araşdırmalar zamanı saxlanılan şəxsin, həmçinin televiziyaların birində efirə gedən verilişdə qonaq kimi iştirak etmək istəyən həkimləri, guya onların həmin kanalda çıxışını təşkil edəcəyi adı altında aldaraq pul vəsaitlərini ələ keçirdiyi də müəyyən edilib.
Qeyd edək ki, saxlanılan şəxs əvvəllər də dələduzluq etdiyindən barəsində cinayət işi mövcuddur və hazırda iş məhkəmə baxışındadır. K.Abuşovun etdiyi sonuncu hüquqazidd əməllər barəsində toplanmış materiallar da baxılması üçün məhkəməyə göndərilib. Məhkəmənin qərarı ilə K.Abuşov həbs edilib. Araşdırmalar davam etdirilir.
