Lənkəranda şəhid Elməddin Məmmədlinin xatirəsinə inşa edilən abidə bulağının açılış mərasimi keçirilib. Bu haqda bu gün, 10 avqust tarixində Cenublu.az Lənkəran ŞİH-yə istinadən xəbər verir.
Tədbir rayonun Velədi kəndində baş tutub. Mərasim zamanı şəhidlərimizin xatirəsi bir dəqiqəlik sükutla yad edilib. Görüşdə Lənkəran ŞİH-nin başçısı Taleh Qaraşov, dövlət qurumlarının nümayəndələri, qazilər və şəhid ailələri iştirak ediblər.
Bulaq kompleksinin açılış lentini icra başçısı Taleh Qaraşov şəhidimizin atası Məmmədov Anarla birgə kəsib.
Qeyd edək ki, Vətən müharibəsi zamanı şəhadətə ucalmış Məmmədli Elməddin Anar oğlu ölümündən sonra "Vətən uğrunda", "Cəsur döyüşçü" və "Füzulinin azad olunmasına görə" medalları ilə təltif olunub.
