Lənkəran Rayon Mərkəzi Xəstəxanasında icbari tibbi sığorta sistemi tətbiq olunur. Bu haqda məlumatı Cenublu.az bu gün, 27 dekabr tarixində Report.az-a istinadən verir.
TƏBİB-nin nəzdində fəaliyyət göstərən müəssisənin tabeliyinə 2 ailə sağlamlıq mərkəzi, 5 kənd ailə sağlamlıq mərkəzi, 30 kənd həkim məntəqəsi, 34 kənd tibb məntəqəsi, Regional Perinatal Mərkəz daxildir.
Lənkəran RMX-də 1894 işçi çalışır. Mərkəz 250.000-dən çox vətəndaşa xidmət göstərir.
İcbari tibbi sığorta sisteminin tətbiqindən sonra tibb müəssisəsinin strukturunda çoxlu dəyişikliklər qeydə alınıb. Belə ki, RMX-nin idarəetmə aparatında bəzi yeniliklər olub, sığortanın təşkili və innovasiya, informasiya texnologiyaları, dəstək xidmətləri, xəstə xidmətləri, satınalma, tibb bacıları şöbələri yaradılıb və tibbi xidmətin əlçatanlılığı təmin olunub.
360 çarpayılıq mərkəzin nəzdində poliklinika, radiologiya, fizioterapiya, cərrahiyyə, urologiya, reanimasiya, təcili yardım, terapiya, uşaq, laboratoriya, yoluxucu xəstəliklər, vərəm, hemodializ, invaziv kardiologiya, ürək-damar cərrahiyyəsi şöbələri fəaliyyət göstərir.
