Azərbaycan Qida Təhlükəsizliyi İnstitutunun (AQTİ) Lənkəran Regional Sınaq Laboratoriyasına gənclər üçün infotur keçirilib. Bu haqda məlumatı Cenublu.az bu gün, 20 fevral tarixində Azərtac-a istinadən verir.
Tədbir AQTİ-nin dəstəyi, Gənclərin İnkişaf və Karyera Mərkəzinin Lənkəran-Astara regional nümayəndəliyinin təşkilatçılığı ilə baş tutub.
İnfotur çərçivəsində gənclərə laboratoriya haqqında ətraflı məlumat verilib. Onlar laboratoriyaya baxış keçirib və maddi-texniki bazası ilə yaxından tanış olublar.
Həmçinin iştirakçılar AQTİ-də işə qəbul prosedurları, təcrübə və könüllülük proqramları haqqında məlumatlandırılıblar, onları maraqlandıran suallar cavablandırılıb.
Qeyd edək ki, laboratoriyada qida məhsullarının keyfiyyət və təhlükəsizlik göstəricilərinin müəyyənləşdirilməsi, bitki və bitkiçilik məhsullarında zərərli orqanizmlərin aşkarlanması, molekulyar bioloji və virusoloji müayinələrin aparılması, eyni zamanda heyvan sağlamlığı üzrə infeksion xəstəliklərin diaqnostikası aparılır.
