Lənkəran Dövlət Dram teatrında aktyor işləyən Amil İbrahimli işdən kənarlaşdırılıb. Bu haqda məlumatı Cenublu.az bu gün, 22 iyul tarixində Bizim.media-ya istinadən verir.
Amil İbrahimlinin sözlərinə görə, teatrda ona qarşı haqsızlıq olub.
İyul ayının 14-də Lənkəranda mədəniyyət nazirinin qəbulunda olduğunu bildirən Amil İbrahimli ayın 17-də nazirlikdə müvafiq şöbədə qəbulda olub. Qəbulda şikayəti ilə əlaqədar məsələlər müzakirə olunub. Ona məsələnin araşdırılacağı deyilib. İki gün əvvəl isə teatrın direktor əvəzi İntiqam Hacılının əmrinə əsasən, Amil ibrahimli işdən azad edilib.
Məsələ ilə bağlı teatrın direktor vəzifəsini müvəqqəti icra edən İntiqam Hacılı ilə əlaqə saxlanılsa da, ondan cavab almaq mümkün olmayıb.
“Siz kimsiniz axı, hüquqşünas, yoxsa vəkil? Sizə niyə açıqlama verməliyəm” deyən İ.Hacılı telefonu üzümüzə bağlayıb.
Qeyd edək ki, daha öncə Lənkəran Dövlət Dram Teatrında baş rejissor və aktyor heyəti arasında ciddi qalmaqal yaranmışdı. Məlumata görə, tərəflər bir-birlərinin üzərinə qayçı ilə hücum çəkmişdilər.
