Lənkəran Dövlət Dram Teatrı Ağsu rayonunun Gəgəli kəndində qastrol səfərində olub. Bu haqda məlumatı Cenublu.az bu gün, 1 aprel tarixində verir.
Teatrın heyəti əvvəlcə Gəgəli kəndinin Şəhidlər xiyabanını ziyarət edib.
Daha sonra Gəgəli kəndi Tərəkəmə yurdu folklor turizmi məkanında – Axtaçı obasında Anar Babalının müəllifi və quruluşçu rejissoru olduğu, 44 günlük Vətən müharibəsinə həsr olunmuş "Haqqın 44 günü" kompozisiya-tamaşası nümayiş etdirilib.
Nümayişdən sonra şəhid atası Pərviz Quliyev, qazi Mehdi Cərullayev, Dağlıq Şirvan Regional Mədəniyyət İdarəsinin əməkdaşı Cavanşir Şeydazadə çıxış edərək təəssüratlarını bölüşüblər.
Qeyd edək ki, tamaşada rolları Səyad Əliyev, Gülər Kərimova, Emil Rzayev, Aysel Babazadə, Günel Abbaszadə, Vəfa Hacızadə, Teymur Hacızadə və Amil İbrahimli ifa edib.
