İmişli rayonunun Bəcirəvan kəndində su qıtlığı sakinlərin ciddi narazılığına səbəb olub.
Cenublu.az xəbər verir ki, kənd əhalisinin sözlərinə görə, əraziyə su vaxtında verilmədiyi üçün kənddaxili suvarma arxları quruyub. Bu vəziyyət həm mal-qaranın və ev quşlarının su təminatını çətinləşdirib, həm də həyətyanı təsərrüfatlara ciddi ziyan vurub.
Vətəndaşlar bildirirlər ki, arxlarda qalan durğun və çürümüş su istifadəyə yararsız olduğundan heyvanlar onu içmir. Onların sözlərinə görə, meyvə ağacları, bostan bitkiləri və digər əkin sahələri vaxtında suvarılmadığı üçün quruma təhlükəsi ilə üz-üzə qalıb, aylardır çəkilən zəhmət isə boşa çıxmaq üzrədir.
Şikayətçilərin sözlərinə görə, məsələ ilə bağlı aidiyyəti qurumlara dəfələrlə müraciət etsələr də, problem hələ də həll olunmayıb. Onlar kəndə suyun qrafik üzrə və vaxtında verilməsini, suvarma arxlarının fasiləsiz su ilə təmin edilməsini tələb edirlər.
