Neftçalanın İkinci Qaralı kənd sakini Ruhəngiz Məhərrəmova özünüməşğulluq proqramından yararlana bilməməsindən şikayətçidir.
O Cenublu.az-a bildirib ki, Şirvan-Salyan Regional Məşğulluq filialına və Neftçala rayon Xidmət Şöbəsinə müraciət edərək heyvanlarla təmin olunmasını istəyib. Lakin iki il ərzində müraciəti müsbət cavablandırılmayıb. Halbuki həyətində heyvan saxlamaq üçün şərait var.
Ruhəngiz Məhərrəmovanın həyat yoldaşı birinci qrup əlildir. Buna görə də o, başqa yerdə işləyə bilmədiyini və ailəni təsərrüfat hesabına dolandırmaq istədiyini deyir.
Dövlət Məşğulluq Agentliyindən isə bildirilib ki, vətəndaş "Qoyunçuluq təsərrüfatı" zərfi üzrə proqrama müraciət edib. İlkin monitorinq zamanı onun artıq qoyunçuluqla məşğul olduğu müəyyən edildiyindən proqrama cəlb edilməsi mümkün olmayıb.
Agentlik vətəndaşa qanunvericiliyə uyğun xidmət göstərildiyini açıqlayıb.
