Ulu öndər Heydər Əliyevin anadan olmasının 101 illiyi münasibətilə və "Yaşıl dünya naminə həmrəylik ili" çərçivəsində Lənkəran, Yardımlı, Masallı üzrə Peşə Təmayüllü Siniflərin şagirdləri Hirkan Milli Parkında "Yaşıl Həyat" adlı ekoloji layihə həyata keçiriblər. Bu haqda məlumatı Cenublu.az bu gün, 11 may tarixində verir.
Şagirdlərə əvvəlcə Hirkan Milli Parkının baş elmi işçisi Həbib Rəhimov tərəfindən park haqqında məlumat verilib və bukletlər paylanılıb.
Daha sonra Peşə Təmayüllü Siniflərdə müxtəlif ixtisaslar üzrə təhsil alan şagirdlər hazırladıqları əl işlərini (rezin təkərlər, quş yuvaları, quşlar üçün yem qabları və yemlər, güllər, oturacaqlar) park ərazisinə bələdçilərin köməkliyi ilə yerləşdiriblər.
Qeyd edək ki, bu layihənin təşkilatçıları Hirkan Milli Parkı olmaqla yanaşı, Azər Məhərrəmov adına Lənkəran şəhər 7 nömrəli tam orta məktəbi, Lənkəran rayon Haftoni qəsəbə tam orta məktəbi, A.B.Nəcəfov adına Yardımlı rayon Arus kənd tam orta məktəbi, Sakit Tağıyev adına Masallı şəhər 4 nömrəli tam orta məktəbinin Peşə Təmayüllü Sinifləridir.
