Həmyerlimiz Vasif Eyvazzadə dünyanın ən nüfuzlu ali təhsil məktəblərindən biri olan Cons Hopkins Universitetinin “Jhpiego” beynəlxalq təşkilatının Qlobal insan resurslarının Müxtəliflik, Bərabərlik və İnklüzivlik müdiri vəzifəsinə təyin olunub. Bu haqda məlumatı Cenublu.az bu gün, 3 aprel tarixində verir.
Vasif Eyvazzadə 1985-ci ildə Astara rayonunun Şiyəkəran kəndində anadan olub. O, 2006-2021-ci illərdə AR Mədəniyyət Nazirliyində müxtəlif vəzifələrdə çalışıb.
2021-ci ildə Azərbaycan Hökuməti ilə BMT Sivilizasiyalar Alyansı və ICESCO-nun birgə elan etdiyi "Mədəniyyət naminə Sülh" (Peace4Culture) Qlobal Çağırışı və bu çərçivədə bir sıra layihələrin ideya müəllifidir.
2022-ci ildə London şəhərində dünyanın bir sıra nüfuzlu alim və şəxsləri ilə birgə yaradılmış “İnsan Təhlükəsizliyi üçün Qlobal Sülh Şurası”nın həmtəsisçisi, 2023-cü ildə isə ABŞ-də yaradılmış İnnovasiya, Mədəniyyət və Təhsilin İdarəedilməsi üzrə Sertifikatlaşdırma İnstitutunun (ABŞ) təsisçisidir.
Azərbaycan Respublikasının Prezidenti tərəfindən sivilizasiyalararası dialoq və UNESCO fəaliyyətləri ilə bağlı 2016-cı ildə “3-cü dərəcəli Vətənə xidmətə görə” ordeni, 2019-cu ildə AR Prezidentinin Fəxri Diplomu ilə təltif edilib, həmçinin TÜRKSOY, “Nizami Gəncəvi” yubiley medalları və “Fəxri mədəniyyət işçisi” döş nişanına da layiq görülüb.
