Həbsdə olan Cəlilabad rayonunun keçmiş icra başçısı Namiq Zeynalovun oğulları Ali Məhkəməyə müraciət edərək müsadirə edilmiş əmlakları geri istəyirlər. Bu haqda məlumatı Cenublu.az bu gün, 31 iyul tarixində Qafqazinfo-ya istinadən verir.
Belə ki, Rəsul və Fərid Zeynalovlar bildiriblər ki, sözügedən əmlaklar onlara məxsusdur və cinayət yolu ilə əldə edilmiş pulla alınmayıb. Kassasiya şikayəti baxılması üçün Ali Məhkəməyə təqdim edilib.
Qeyd edək ki, Namiq Zeynalov 2021-ci ildə həbs edilib. O, xüsusilə külli miqdarda mənimsəmə, israf etmə, vəzifə səlahiyyətlərindən sui-istifadə, külli miqdarda rüşvət almaqda təqsirli bilinib. Lənkəran Ağır Cinayətlər Məhkəməsinin hökmü ilə ona 12 il həbs cəzası verilib.
Bundan başqa, iş üzrə üzərinə həbs qoyulmuş ümumi dəyəri 2 milyona yaxın olan fərdi yaşayış evləri, “Lexus” markalı minik avtomobili, müxtəlif təyinatlı torpaq sahələri dövlət nəfinə müsadirə edilib.
Şirvan Apellyasiya Məhkəməsi hökmü qüvvədə saxlayıb.
