Fövqəladə Hallar Nazirliyinin (FHN) Dövlət Yanğın Nəzarəti Xidmətinin mütəxəssislərinin iştirakı ilə Cənub Regional Mərkəzi tərəfindən Lənkəran Beynəlxalq Hava Limanında və Lənkəran-Astara Regional Mədəniyyət İdarəsində tədbirlər keçirilib. Bu məlumatı Cenublu.az bu gün, 22 iyul tarixində verir.
Tədbirlərdə fövqəladə halların təsnifatı, ölkəmiz üçün xarakterik olan fövqəladə hallar, o cümlədən yanğınların başvermə səbəbləri və bu zaman zəruri davranış qaydaları barədə ətraflı məlumat verilib, FHN-in “112” qaynar xəttinin təyinatı izah olunub, ilkin yanğınsöndürmə vasitələrindən istifadə qaydaları əyani şəkildə nümayiş etdirilib.
İnteraktiv formada keçirilən tədbirlər zamanı iştirakçıların sualları cavablandırılıb.
Qeyd edək ki, tədbirlərin keçirilməsində məqsəd baş verə biləcək təbii və texnogen xarakterli fövqəladə hadisələrlə bağlı zəruri davranış qaydaları barədə vətəndaşlara müvafiq biliklərin verilməsidir.
