Ələt–Astara magistral yolunun kənarlarının çəpərlənməsinə baxmayaraq, bəzi yerlərdə çəpərlər sökülür və heyvanlar yola buraxılır. Bu haqda məlumatı Cenublu.az bu gün, 16 aprel tarixində Qafqazinfo-ya istinadən verir.
Sürücülər bu problemlə, əsasən, Masallı, Lənkəran, Astara ərazilərində rastlaşdıqlarını qeyd ediblər.
Mövzu ilə bağlı Azərbaycan Avtomobil Yolları Dövlət Agentliyindən (AAYDA) bildirildi ki, sözügedən ərazidə çəpərlər yol istismara verilən zaman quraşdırılıb: “Həmin yol inşa edilən, istismara verilən zaman yol kənarına çəpərlər quraşdırılıb. Çünki həmin yol sürətli, magistral yoldur. Yəni ora canlının çıxması olduqca təhlükəlidir. Əfsuslar olsun ki, oradakı vətəndaşlar çəpərləri kəsib, heyvanları, mal-qaranı yol kənarına buraxırlar. Bu da nəticədə bədbəxt hadisə ilə sonlanır”.
Həmçinin qurumdan bildirilib ki, əraziya mütəmadi baxış keçirilir: “Əməkdaşlarımız mütəmadi olaraq əraziyə baxış keçirsələr də, bu kimi hallar təkrarlanır. Yol inşa olunanda xüsusi keçidlər qoyulur. Bu da yolun bir tərəfindən digər tərəfinə həm insanların, həm də heyvanların təhlükəsiz şəkildə keçməsini təmin edir. Burada problem insanların çəpərləri sökmələridir”.
Lənkəran Şəhər İcra Hakimiyyəti isə məsələyə belə münasibət bildirib: “Lənkəran Şəhər İcra Hakimiyyətinin tapşırıq və tövsiyələrinə uyğun olaraq, inzibati ərazi dairələri üzrə nümayəndəliklər və bələdiyyələr tərəfindən yol ətrafındakı mühafizə çəpərlərinin sökülməsinin, habelə mal-qaranın nəzarətsiz yollara buraxılmasının törədə biləcəyi təhlükə və fəsadlar barədə yerlərdə sakinlərlə müntəzəm maarifləndirmə işləri aparılır və sözügedən məsələ daim nəzarətdə saxlanılır”.
