Cəlilabad rayonunun Privolniye kəndinin əhalisi uzun illərdir kənddaxili yolların bərbad vəziyyətindən əziyyət çəkdiklərini bildirirlər.
Cenublu.az xəbər verir ki, təxminən 5 min nəfərin yaşadığı kənddə yolların yararsız olması sakinlərin gündəlik həyatını çətinləşdirib. Onların sözlərinə görə, yay aylarında avtomobillərin hərəkəti zamanı qalxan qatı toz həm sağlamlığa, həm də məişət şəraitinə mənfi təsir göstərir.
Vətəndaşlar qeyd edirlər ki, payız və qış mövsümündə isə yollar palçığa çevrildiyindən nə piyadaların, nə də avtomobillərin rahat hərəkəti mümkün olur. Bu vəziyyətdən ən çox əziyyət çəkənlər məktəblilərdir. Şagirdlər hər gün məktəbə gedib-gələrkən palçıqlı və keçilməsi çətin olan yollarla hərəkət etmək məcburiyyətində qalırlar.
Şikayətçilərin sözlərinə görə, problemlə bağlı dəfələrlə aidiyyəti qurumlara müraciət edilsə də, indiyədək hər hansı əsaslı tədbir görülməyib. Onlar Privolniye kəndinin yollarının qısa zamanda təmir olunmasını və problemin nəhayət həllini tapmasını istəyirlər.
