Cenublu.az sosial şəbəklərdə keçirdiyi sorğu əsasında Cənub zonasının parklarının müsbət və mənfi tərəfləri haqda məlumatları oxucularına bu gün, 23 avqust tarixində təqdim edir.
Belə ki, sorğuda iştirak edən izləyicilərimizin əksəriyyəti əsasən parklarda irigövdəli, yəni yetərincə sərinlik və kölgə verə biləcək ağacların olmamasından yazıblar. Həmçinin dekorativ ağacların çoxluq təşkil etməsi də onlar tərəfindən birmənalı qarşılanmayıb.
Oturacaqların və zibil qablarının sayının az olması, fəvvarələrin işləməməsi və onların suyunun vaxtı-vaxtında dəyişdirilməməsi də, görünür ki, cənub zonasının parklarını birləşdirən bir xüsusiyyətdir.
İzləyicilərimizdən bir neçəsi isə parklarda uşaq meydançasının olmamasından və ya pis vəziyyətdə olmasından yazıblar. “Sahil parkında keçən dəfə qızım sürüşərkən ayağı cızıldı”, - deyə izləyicimizdən biri bildirib.
Digər oxucumuz əhaliyə görə ölkənin sayca 5-ci böyük şəhəri olan Lənkəranda atraksion parkının olmasını arzulayır.
Lənkərandan olan izləyicimizin biri yazıb: “Saat 12-dən sonra şəhərin bütün işıqları söndürülür. Nəinki parka, heç şəhərə belə çıxıb gəzə bilmirik”.
İzləyicilərimizdən biri 380 mindən çox əhalisi olan Lənkəranda cəmi 3 parkın olmasını qeyd edib. ”Heydər Əliyev adına olan Xatirə parkı 1500, Həzi Aslanov parkı 300, Lənkəran Dənizkənarı parkı isə 700 nəfərə kimi adam tuta bilir. Belə çıxır ki, əhalinin yalnız 5 %-i parklara gedə bilər. Bəs digərləri? Parkların sayını artırmaq lazımdır”,- deyə şəhər sakini bildirib.
Masallıdan olan izləyicilərimiz isə şəhərdə 2-3 park olmasına baxmayaraq, “ASAN xidmət” mərkəzinin parkını bəyəndiklərini qeyd ediblər.
Daha bir izləyicimiz isə parklara gərək olmadığını, təbiətin özünün park olduğunu vurğulayıb.
Cənublu.az sorğuda iştirak edən bütün izləyicilərə təşəkkür edir. Sizin fikirləriniz və rəyləriniz bizim üçün çox önəmlidir.
