Cəlilabaddan olan Əməkdar artist Yusif Mustafayevə 110 min dollarlıq maşın bağışlayıblar. Bu haqda məlumatı Cenublu.az bu gün, 27 mart tarixində Ölkə.Az-a istinadən verir.
Sənətçi Yusif Mustafayev qonaq olduğu "Rəngarəng səhər" verilişində qeyd edib ki, 13 il əvvəl ona qocalar evində çıxış etdiyi üçün bahalı avtomobil hədiyyə olunub.
"2011-ci ildə mənə bir zəng gəldi. Dedilər: “Get, filan yerdən "İnfitini QX56" markalı avtomobili götür. Getdim gördüm ki, sənəddə adım yazılıb: Yusif Mustafayev. Dedilər ki, sənədə imza atım. Avtomobilin qiyməti isə 110 min dollar idi. Sənədə imza atandan sonra dedilər ki, Baş Dövlət Yol Polisi İdarəsinə gedim. Orada sual verdilər: “Nəqliyyat vasitəsi üçün hansı nömrəni istəyirsiniz?” Cavab verdim: “İstər mənim, istər ailəmin, hətta nəslimin bütün üzvlərində olan maşınlarımızın nömrəsi 464-dür. Dedilər: "Yox, ürəyin istəyən digər nömrəni seç". Gördüm ki, burada başqa iş var... 90-KT-900 nömrəsini seçdim. Heç bilmədim bu avtomobili və bu nömrəni mənə haradan və kim bağışladı. Yalnız onu bilirəm ki, qocalar evində mahnı oxuduğuma görə bunları mənə verdilər. 2-3 il əvvəl isə bu avtomobili satıb, başqasını aldım", – deyə Yusif Mustafayev hadisə barədə danışıb.
