Cəlilabadda üzüm mövsümünün nübar yığımına başlanılıb. Bu haqda məlumatı Cenublu.az bu gün, 21 iyul tarixində Azərtac-a istinadən verir.
Bu il məhsul bol olmasına baxmayaraq, qiymətlər bir qədər aşağıdır. Paytaxt bazarlarında tələbat çox olduğundan fermerlər az miqdarda məhsulu xaricə çıxarıblar.
Qeyd olunub ki, Cəlilabadda son illərdə süfrə üzüm sortlarının bazarlarda tələbatın çox olmasından fermerlər məhz onun becərilməsinə üstünlük verir.
Bu sahə ilə məşğul olan Güloğlan Əliyev bildirib ki, “Atika” və “Viktoriya” üzümlərinin becərilməsi daha sərfəlidir, çünki bu sort Cəlilabadın iqlimində daha tez yetişir və məhsuldardır.
Fermerin sözlərinə görə, hazırda bazara ilk olaraq tez yetişən "Prima" və "Ora" sortları çıxarılıb. “Ora” sortu ağ, “prima” sortu isə qara üzümdür. Qiymətlərə gəldikdə isə, növündən asılı olaraq, bir kiloqram üzümün qiyməti 60 qəpik və 1 manat arasında dəyişir. Bu da ötən illə müqayisədə müəyyən qədər aşağıdır.
Yerli üzümü alıcılar sahələrdən alıb ölkənin digər rayonlarının bazarlarında satışa çıxarırlar. Onlar üzümü yerində 60 qəpiyə alıb, bazarda 80-90 qəpiyə sata bilirlər.
Cəlilabad rayonunda yetişdirilən üzüm, əsasən, Bakı və ətraf rayonların bazarlarında satışa çıxarılır. Bir hektarlıq sahədən 95 sentnerə yaxın məhsul əldə olunur.
Qeyd edək ki, rayonda üzüm sahəsində yığım prosesi sentyabrda sona çatacaq.
