Cəlilabadda Novruz bayramı münasibətilə ümumxalq şənliyi keçirilib. Bu haqda məlumatı Cenublu.az bu gün, 19 mart tarixində verir.
Bayram şənliyində Cəlilabad Rayon İcra Hakimiyyətinin başçısı Rafiq Cəlilov, RİH başçısı aparatının əməkdaşları, Cəlilabad rayonunun hüquq-mühafizə orqanlarının rəhbərləri, idarə, müəssisə, təşkilat rəhbərləri və ictimaiyyət nümayəndələri iştirak ediblər.
Tədbir iştirakçıları əvvəlcə xalqımızın qədim ənənələrini, dəyərlərini, mətbəxini, məişətini əks etdirən pavilyonlarla tanış olublar.
Ümumrayon şənliyində Dövlət Himni səsləndirildikdən sonra tədbir açıq elan olunub.
RİH başçısı Rafiq Cəlilov mədəni dəyərləri, eləcə də xeyirxahlıq, birlik və həmrəylik kimi gözəl ənənələri əks etdirən Azərbaycan xalqının qədim tarixinin yadigarı və milli varlığının rəmzlərindən biri olan Novruzun gəlişi münasibətilə bütün cəlilabadlıları, eləcə də tədbir iştirakçılarını səmimi qəlbdən təbrik edib, onlara ən xoş arzularını çatdırıb.
Həmçinin Cəlilabad rayonu ərazisində fəaliyyət göstərən məktəbəqədər və orta ümumtəhsil müəssisələrindən gələn özfəaliyyət dərnəklərinin, rəqs və mahnı qruplarının folklor nümunələri və rayonda fəaliyyət göstərən idman məktəblərinin nümunəvi idman çıxışları olub.
Daha sonra rayon rəhbəri Rafiq Cəlilov alqış sədaları altında bayram tonqalını yandırıb.
Tədbir rayonun incəsənət ustalarının və mədəniyyət kollektivlərinin iştirakı ilə geniş proqramlı bayram konserti ilə davam edib.
Qeyd edək ki, tədbir Cəlilabad Rayon İcra Hakimiyyətinin və Lənkəran-Astara Regional Mədəniyyət İdarəsinin Cəlilabad rayon nümayəndəliyinin birgə təşkilatçılığı ilə baş tutub.
