Cəlilabad Rayon Mərkəzi Xəstəxanasında 31 yaşlı kişinin ölümü ilə bağlı Tibbi Ərazi Bölmələrini İdarəetmə Birliyi (TƏBİB) açıqlama verib. Bu haqda məlumatı Cenublu.az bu gün, 25 may tarixində verir.
31 yaşlı Vahid Nuriyevin ölümü ilə bağlı daha öncə məlumat vermişdik.
V.Nuriyevin qonşusu Rəşad Əzizov BakuTV-yə açıqlamasında bildirib: “Üç-dörd dəfə onu xəstəxanaya apardıq, dedilər: “Gedin, yara çirklənəndə gələrsiniz, heç bir problem olmayacaq”. Bu gün səhər xəstəxanaya apardıq, sağ ayağı tamamilə şişmişdi. Üç dənə sistem qoşdular, amma faydası olmadı. Birdən-birə halı pisləşdi, reanimasiyaya qaldırdılar. 10 dəqiqə sonra məlumat verdilər ki, vəfat edib".
"Ona ilkin tibbi yardımlar göstərilib, təcili Reanimasiya şöbəsinə yerləşdirilib. Pasiyentə zəruri tibbi yardımlar göstərilsə də, həkimlərin səylərinə baxmayaraq, saat 09:35 radələrində ölüm halı qeydə alınıb. Meyit təşrih üçün Məhkəmə-Tibbi Ekspertiza və Patoloji Anatomiya Birliyinin Cəlilabad Rayon şöbəsinə təhvil verilib. Ölümün dəqiq səbəbi ekspertizanın rəyindən sonra məlum olacaq", – deyə TƏBİB-dən bildirilib.
