Cəlilabad rayonunda qısqanclıq zəminində həyat yoldaşını öldürməyə cəhd edən 27 yaşlı Valehin apellyasiya şikayəti təmin olunmayıb. Bu haqda məlumatı Cenublu.az bu gün, 19 avqust tarixində Teleqraf.com-a istinadən verir.
Lənkəran Ağır Cinayətlər Məhkəməsinin hökmü ilə Valeh 14 il müddətinə azadlıqdan məhrum edilib. O, cəzasını ciddi rejimli cəzaçəkmə müəssisəsində çəkəcək.
Hökmdən narazı qalan Valeh apellyasiya şikayəti verib. O, himayəsində olan 2 övladının olduğunun nəzərə alınmasını və təyin olunan cəzanın yüngülləşdirilməsini istəyib.
Onun şikayəti Şirvan Apellyasiya Məhkəməsində araşdırılıb və yekun qərara görə, apellyasiya şikayəti təmin olunmayıb.
Qeyd edək ki, Valeh 21 oktyabr 2022-ci ildə gecə saat 3:00 radələrində qısqanclıq zəminində həyat yoldaşına baltanın çapıcı-kəsici tərəfi ilə baş və boyun nahiyələrinə bir neçə zərbə endirib. Ağır vəziyyətdə olan qadın ailə üzvləri tərəfindən vaxtında xəstəxanaya çatdırılıb və onun həyatını xilas etmək mümkün olub. O, həyat yoldaşı Xatirənin (ad şərtidir) iki azyaşlı övladları ilə birgə Bakıda kirayədə yaşadığı dövrdə tanış olduğu Sahil ilə sevgi münasibətləri qurduğuna əmin olduğu üçün bu addımı atıb.
