Bu gün, 15 mart tarixində Azərbaycan Hərbi Dəniz Qüvvələrinin miçmanı şəhid Mirzə Axundovun doğum günüdür.
Mirzə Musa oğlu Axundov 1984-cü ildə Lənkəran rayonunun Gəgiran kəndində anadan olub.
2002-2004-cü illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. Hərbi xidmətini başa vurduqdan sonra isə müddətdən artıq həqiqi hərbi xidmət qulluqçusu olan Mirzə Axundov 2004-2016-cı illərdə Azərbaycan Silahlı Qüvvələrinin Zığ qəsəbəsində yerləşən “N” saylı hərbi hissəsində, 2016-2019-cu illərdə Ağdam rayonunda yerləşən “N” saylı hərbi hissəsində, 2019-cu ildən isə Tərtər rayonunda yerləşən “N” saylı hərbi hissəsində xidmət edib. 2016-cı ildə Aprel döyüşlərində iştirak edib.
Azərbaycan Ordusunun Hərbi Dəniz Qüvvələrinin miçmanı olan Mirzə Axundov 2020-cı ildə başlanan Vətən müharibəsi zamanı Suqovuşanın və Talışın azadlığı uğrunda gedən döyüşlərdə iştirak edib. M.Axundov oktyabrın 2-də Talış istiqamətində şəhidlik zirvəsinə ucalıb. Xəzər rayonunun Türkan qəsəbəsində dəfn edilib.
Mirzə Axundov sağlığında "Azərbaycan Respublikasi Silahli Qüvvələrinin 90 illiyi (1918-2008)", "Azərbaycan Respublikası Silahlı Qüvvələrinin 95 illiyi (1918-2013)", "Qüsursuz xidmətə görə" 3-cü dərəcəli, "Qüsursuz xidmətə görə" 2-ci dərəcəli, "Azərbaycan Ordusunun 100 illiyi (1918-2018)" medalları ilə təltif olunub.
Ölümdən sonra “Vətən Uğrunda”, “Suqovuşanın azad olunmasına görə” və “Laçının azad olunmasına görə” medalları ilə təltif edilib.
