Bu gün, 16 avqust tarixində Vətən müharibəsi şəhidi, Xüsusi Təyinatlı Qüvvələrin giziri İntiqam Əsgərlinin doğum günüdür.
İntiqam Əsgərli 1990-cı ildə Masallı rayonunun Viləş kəndində anadan olub.
Aprel döyüşləri zamanı İntiqam Əsgərli Talış kəndi istiqamətində özü ilə eyni rütbədə olan qardaşı, gizir Nurlan Əsgərli ilə birlikdə döyüşüb. Qardaşı ilə birgə döyüş meydanından şəhidlərimizin, həmçinin polkovnik Vüqar Yusifovun və polkovnik-leytenant Raquf Orucovun nəşini çıxarıb. 4 aprel 2016-cı ildə Talış kəndi istiqamətində döyüş tapşırığını yerinə yetirərkən qardaşı Nurlan Əsgərli həlak olub və İntiqam Əsgərli onun nəşini özü döyüş meydanından çıxarıb.
İntiqam Əsgərli Vətən müharibəsi zamanı Şuşanın azadlığı uğrunda gedən döyüşlərdə də savaşıb.
O, 9 noyabr 2020-ci ildə Şuşa istiqamətində gedən döyüşlərdə döyüş tapşırığının yerinə yetirilməsi zamanı şəhidlik zirvəsinə ucalıb.
İntiqam Əsgərli bir çox medallarla təltif olunub: "Azərbaycan Silahlı Qüvvələrinin 95 illiyi", "Qüsursuz xidmətə görə", "Azərbaycan Ordusunun 100 illiyi".Ölümündən sonra isə "Vətən Müharibəsi Qəhrəmanı", "Vətən uğrunda", "Şuşanın azad olunmasına görə", "Cəsur döyüşçü" , "Xocavəndin azad olunmasına görə", "Kəlbəcərin azad olunmasına görə" medalları ilə təltif olunub.
