Bu gün, 15 avqust tarixində Vətən müharibəsi şəhidi əsgər Əli Mehdizadənin doğum günüdür.
Əli Mehdizadə 2001-ci ildə Lənkəranda anadan olub. O, Lənkəran şəhər 1 nömrəli tam orta məktəbini bitirdikdən sonra hərbi xidmətə yollanıb. Gənc əsgər 2020-ci il sentyabrın 27-də başlanan Vətən müharibəsində iştirak edib. Əli Mehdizadə Murovdağın, Cəbrayılın, Füzulinin, Xocavəndin və Şuşanın azadlığı uğrunda gedən döyüşlərdə vuruşub.
O, Cəbrayıl istiqamətində çiynindən qəlpə yarası alıb və hospitala yerləşdirilib. Müalicəsi bitdikdən sonra yenidən döyüşə yollanıb. Əli Mehdizadə 1 noyabr tarixində səhər saatlarında Şuşa döyüşləri gedişatında rayonun Daşaltı kəndi istiqamətində 1553 metr yüksəklikdə qəhrəmancasına həlak olub.
O, ölümündən sonra "Şücaətə görə", "Vətən uğrunda", "Cəsur döyüşçü", "Şuşanın azad olunmasına görə", "Xocavəndin azad olunmasına görə", "Kəlbəcərin azad olunmasına görə" medalları və "Rəşadət" ordeni ilə təltif olunub.
