Bu gün Azərbaycan Respublikasının Milli Qəhrəmanı, Birinci Qarabağ müharibəsi şəhidi Vüqar Mirəzbər oğlu Mürsəlovun doğum günüdür.
Vüqar Mürsəlov 1963-cü ildə martın 10-u Cəlilabad rayonunun Göytəpə şəhərində anadan olub. 1980-ci ildə 1 saylı orta məktəbi bitirdikdən sonra 67 saylı Bakı texniki-peşə məktəbində təhsilini davam etdirib. Daha sonra Bakı Politexnik Texnikumunu əla qiymətlərlə başa vuraraq Belarusun Brest şəhərində hərbi xidmətə başlayıb. Qvardiya baş çavuşu, tankçı kimi fəaliyyət göstərən Vüqar 1984-cü ildə ordudan tərxis olunub. O, Göytəpə Avtomobil Təmiri Zavodunda öz ixtisası üzrə əmək fəaliyyətinə başlayıb.
V.Mürsəlov 1991-ci ildə Xüsusi Təyinatlı Polis Dəstəsinə yazılıb və torpaqlarımızın müdafiəsinə qalxıb. Füzuli, Xanlar, Ağdam, Laçın, Şuşa, Goranboy, Ağdərə istiqamətində döyüşlərdə iştirak edib.
9 iyun 1992-ci ildə erməni faşistləri Tərtər rayonunun Cəmilli kəndi istiqamətindən hücuma keçiblər. V.Mürsəlov bu döyüşlərdə snayper gülləsi alaraq şəhidlik zirvəsinə ucalıb.
Azərbaycan Respublikası Prezidentinin 8 oktyabr 1992-ci il tarixli 264 saylı fərmanı ilə Mürsəlov Vüqar Mirəzbər oğluna ölümündən sonra “Azərbaycanın Milli Qəhrəmanı” adı verilib.
Bakı şəhərində Şəhidlər xiyabanında dəfn olunub.
Göytəpə şəhərində oxuduğu məktəbə onun adı verilib, şəhərin mərkəzində büstü qoyulub. Tərtər, Göytəpə, Cəlilabad şəhərlərində adına küçə var.
