Bu gün, 20 iyun tarixində Lənkəran Dövlət Dram Teatrının aktrisası Qızılgül Quliyevanın doğum günüdür.
Qızılgül Quliyeva 1960-cı ildə Lənkəran rayonunun Separadi kəndində anadan olub. 1976-cı ildə, kənd orta məktəbini bitirdikdən sonra Mədəniyyət Evində əmək fəaliyyətinə başlayıb. 1981-ci ildə Lənkəran Dövlət Dram Teatrının truppasında aktrisa ştatına işə qəbul olunub. 1982-1987-ci illərdə Mirzağa Əliyev adına Azərbaycan Dövlət İncəsənət İnstitutunun Mədəni-maarif fakültəsində ali təhsil alıb.
Q.Quliyeva teatrda çalışdığı ötən müddət ərzində səhnədə 80-dən çox tamaşada müxtəlif xarakterli rollarda çıxış edib.
Aktrisa, həmçinin bir sıra teleseriallarda və bədii filimlərdə yaratdığı rollarla yadda qalıb.
Q.Quliyeva 1986-cı ildə respublika teatrları arasında keçirilən müsabiqədə 1-ci diploma və pul mükafatına, 2021-ci ildə isə Azərbaycan Respublikası Prezidentinin mükafatına layiq görülüb.
