Bu gün, 29 mart tarixində Əməkdar artist Nazir Kərim oğlu Əliyevin doğum günüdür.
Nazir Əliyev 1946-cı ildə Lənkəran rayonunun Liman şəhərində anadan olub. 1964-cü ildə orta məktəbi bitirdikdən sonra M.A.Əliyev adına Azərbaycan Dövlət İncəsənət İnstitutunun dram və kino aktyorluğu fakültəsinə daxil olub, 1968-ci ildə institutu bitirdikdən sonra təyinatla Sumqayıt Dövlət Dram Teatrına işləməyə göndərilib.
1970-ci ildə Mədəniyyət Nazirliyinin təyinatı ilə N.Əliyev C.Məmmədquluzadə adına Naxçıvan Dövlət Musiqili Dram Teatrına aktyor təyin olunub, bu sənət ocağında 20-dən artıq tamaşada oynayıb.
1975-ci ilin mart ayında Nazir Əliyev Lənkəran Dövlət Dram Teatrına dəvət olunub, burada işlədiyi 9 il ərzində 40-dan çox tamaşada rol alıb. Aktyorun yaradıcılığının kamillik dövrü də məhz Lənkəran teatrının səhnəsində başlayıb.
1 dekabr 1982-ci ildə Azərbaycanın Əməkdar artisti fəxri adına layiq görülüb.
1988-ci ildə aktyor Azərbaycan Dövlət Akademik Dram Teatrında işləməyə dəvət olunub, bir müddət sonra öz arzusu ilə sənətini tərk edərək ömrünün sonuna kimi Birləşmiş Ərəb Əmirliklərinin Dubay şəhərində yaşayıb.
Nazir Əliyev 28 avqust 1997-ci ildə Dubay şəhərində vəfat edib, doğulduğu Lənkəran rayonunun Liman şəhərində dəfn olunub.
