Bu gün, 19 aprel tarixində Lənkəran Dövlət Dram Teatrında çalışan görkəmli sənətkar, Azərbaycan Respublikası Prezidentinin fərdi təqaüdçüsü, "Şərəf" mükafatı laureatı Qabil Quliyevin 75 illik yubileyidir.
Qabil Əzizulla oğlu Quliyev 1949-cu ildə Cəlilabad rayonunun Tahirli kəndində doğulub.
Qabil Quliyev 1968-ci ildə M.A.Əliyev adına Azərbaycan Dövlət İncəsənət İnstitutunun Dram və kino aktyorluğu fakültəsinin əyani şöbəsinə daxil olub. Azərbaycanın Xalq artistləri Əliheydər Ələkbərov və professor Rza Təhmasibin sinfində təhsil alıb.
1972-ci ildə institutu bitirdikdən sonra təyinatla Sumqayıt Dövlət Musiqili Dram Teatrına göndərilib. Lakin bu təyinatla razılaşmayıb və hərbi xidmətə yollanıb. Moskvada “Mosfilm” kinostudiyasının hərbiləşdirilmiş kinobazasında xidmət edib.
1973-cü ildən Lənkəran Dövlət Dram Teatrında işləyir. Ötən müddət ərzində 100-dən artıq tamaşada oynayan aktyor, həmçinin bir sıra bədii və televiziya filmlərində çəkilib.
Ona 1979-cu ildə “Azərbaycanın Əməkdar artisti”, 2000-ci ildə “Xalq artisti” fəxri adları verilib. 2021-ci ildən Prezident təqaüdçüsüdür.
O, həmçinin Azərbaycan Teatr Xadimləri İttifaqının ”Şərəf” mükafatına layiq görülüb.
