Bu gün, 13 aprel tarixində Vətən müharibəsi şəhidi Ümid Qasımzadənin doğum günüdür.
Şəhidin anım mərasimində Vətəndaş Həmrəyliyi Partiyası Ali Məclisinin üzvü Faiq Ağayev iştirak edib. O, şəhidin məzarına baş çəkib və ruhuna dualar oxuyub.
Ümid Qasımzadə 2001-ci ildə Cəlilabad rayonunun Göytəpə qəsəbəsində anadan olub. O, uşaq yaşlarından idmanın ağırlıqqaldırma növü ilə məşğul olub. Ü.Qasımzadə 2019 və 2020-ci illərdə gənclər arasında keçirilən Azərbaycan çempionatlarında gümüş medallara layiq görülüb.
İgidimiz 2020-ci ildən Azərbaycan Silahlı Qüvvələrinin sıralarında müddətli həqiqi hərbi xidmətdə idi. Həmin il başlanan Vətən müharibəsi zamanı Füzulinin azadlığı uğrunda gedən döyüşlərdə savaşıb. Oktyabrın 13-də Füzuli uğrunda döyüşlər zamanı şəhid olub. Cəlilabad rayonunda dəfn edilib.
Ölümündən sonra "Vətən uğrunda", "Döyüşdə fərqlənməyə görə" və "Füzulinin azad olunmasına görə" medalları ilə təlfif olunub.
