Beynəlxalq Qırmızı Xaç Komitəsi nümayəndələri Ermənistanda saxlanılan iki Azərbaycan vətəndaşına baş çəkiblər. Bu haqda məlumatı Cenublu.az bu gün, 8 avqust tarixində Apa-ya istinadən verir.
Ziyarət zamanı saxlanılan şəxslərin ailələri ilə əlaqə yaratmaq üçün şərait yaradılıb.
Xatırladaq ki, Naxçıvan Muxtar Respublikasının Şahbuz rayonunun Ermənistanla sərhədboyu ərazisində əlverişsiz hava şəraitində məhdud görmə səbəbindən Azərbaycan ordusunun itkin düşmüş əsgərləri - 20 yaşlı lənkəranlı Axundov Hüseyn Əhliman oğlu və 19 yaşlı Bəbirov Aqşin Qabil oğlu Ermənistan tərəfindən əsir götürülüblər.
Qeyd edək ki, Hüseyn Axundov “Ermənistanın dövlət sərhədini qanunsuz keçməkdə, odlu silah və döyüş sursatı daşımaqda" ittiham olunaraq və “Zəngəzur mis-molibden kombinatının gözətçisini qətlə yetirməkdə” təqsirləndirilərək həbs edilib.
