Masallının ən böyük yaşayış məntəqəsi olan Boradigah qəsəbəsinin elektrik təsərrüfatı infrastrukturunun yenilənməsinə ehtiyac var. Bu haqda məlumatı Cenublu.az bu gün, 2 sentyabr tarixində Report.az-a istinadən verir.
Sakinlər qəsəbənin transformatorlarının və elektrik dirəklərinin qəzalı vəziyyətdə olduğunu bildirirlər.
“Ərazidəki transformatorlar istismar müddətini çoxdan başa vurub. Bundan başqa, yağışlı vaxtlarda transformatorlar əsl təhlükə mənbəyinə çevrilir. Üstü açıq, qəzalı transformatorların heç birinin mühafizə səddi yoxdur.
Sakinlər onları narahat edən problemlərlə bağlı aidiyyəti qurumlara müraciət etmək məcburiyyətində qalıblar.
Onlar qeyd ediblər ki, ölkənin ən böyük şəhər tipli qəsəbələrindən olan Boradigahda 10 mindən artıq sakin yaşayır. Qəsəbədə iki məktəb, xəstəxana, poliklinika, polis bölməsi və digər dövlət qurumları fəaliyyət göstərir.
Masallı Rayon Elektrik Şəbəkəsinin rəisi Samir Hüseynov açıqlamasında abonentlərin şikayətinin yerində araşdırıldığını söyləyib. Onun sözlərinə görə, məsələ ilə bağlı Bakıdan nümayəndə gəlib, sakinlərlə görüşüb. Müəyyən olunub ki, vəziyyət tam olaraq sakinlərin söylədikləri kimi deyil. Lakin problemlər mövcuddur və mütəmadi olaraq aradan qaldırılır.
Belə ki, Bakıdan gələn nümayəndələrin iştirakı ilə evlərdə ölçmələr aparılıb. Gərginliyin 220 voltdan yuxarı olduğu qeydə alınıb. Müraciətdə əks olunan dayaqların da köhnə fotoşəkillər olduğu müəyyən edilib. Sakinlər özləri də bunu təsdiq ediblər. Çünki ərazidəki dayaqlar yenilənib. O ki qaldı köhnə transformatorlara, rəhbərlik tərəfindən həmin transformatorlar üçün təhlükəsizliyi təmin edən xüsusi örtük qutuları ayrılıb. Biri artıq yerinə qoyulub, yaxın günlərdə digərlərinin də quraşdırılması həyata keçiriləcək”.
Qeyd edək ki, Boradigah qəsəbəsində 1610 əhali, 164 qeyri-əhali abonenti var. Qəsəbə 110-35 kilovoltluq Tüklə yarımstansiyasından çıxan 10 kilovoltluq 6 saylı hava xəttindən qidalanır. Ərazidə müxtəlif güclərdə olan 14 transformator yarımstansiyası mövcuddur.
