Lənkəran-Astara Regional Təhsil İdarəsi Yardımlı rayonu Arvana kənd tam orta məktəbinin direktorunun baldızı ilə zorla evlənməsi məsələsini araşdırmağa başlayıb. Bu haqda məlumatı Cenublu.az bu gün, 16 sentyabr tarixində Apa.az-a istinadən verir.
Belə ki, “Təmiz Dünya” Qadınlara yardım İctimai birliyinin sədri Mehriban Zeynalova ötən gün bu məsələ ilə bağlı xəbər verib. O qeyd edib ki, Yardımlıdan onun yanına - Bakıya bir qadın uşağı ilə birgə ayaqyalın qaçıb gəlib. Səbəb isə onun zorla bacısının əri ilə evləndirilməsi olub. Ən dəhşətlisi isə atasının bu izdivaca razılıq verməsidir.
Belə ki, qadın 3 il evli olub və boşandıqdan sonra atasının evinə qayıdıb. Ata qızını bir müddət saxladıqdan sonra onu digər qızının ərinə vermək istəyib. Ata boşanmış qızına: “o imkanlıdır, səni yaxşı saxlayacaq”,- deyərək razı salmağa çalışıb.
Həmçinin, qadın qeyd edib ki, bacısının əri - Alvana kənd məktəbinin direktoru Kamran İsayev qadından xəbərsiz onunla kəbin kəsdirib və xanıma: “mən səninlə kəbin üçün 40 manat vermişəm”,- deyərək evinə aparmağa çalışıb. Qadın razılaşmadığı üçün isə ona zor tətbiq edib.
Alvana kənd məktəbinin direktoru Kamran İsayev onun haqqında yayılan məlumatın yalan olduğunu və ona böhtan atıldığını bildirib.
Qeyd edək ki, məsələ ilə bağlı Lənkəran-Astara Regional Təhsil İdarəsi ilə yanaşı, Ailə, Qadın və Uşaq Problemləri üzrə Dövlət Komitəsi və Daxili İşlər Nazirliyi də araşdırma aparır.
