Cəlilabad rayonunda çiyələk sahələri 510 hektara çatdırılıb. Bu haqda məlumatı Cenublu.az bu gün, 17 avqust tarixində Fed.az-a istinadən verir.
Belə ki, son bir neçə ildə çiyələk becərilməsində tətbiq olunan innovasiyalar məhsuldarlığın artmasına, su və torpaq resurslarından daha səmərəli istifadə olunmasına, istehsalda maya dəyərinin aşağı düşməsinə müsbət təsir göstərir.
Fermerlərin sözlərinə görə, ən çox satılan çiyələk sortu “Murano” hesab olunur. Hazırda fermerlər bu sortu Rusiya və ərəb ölkələrinə ixrac etmək üzərində işləyirlər.
Cəlilabad Dövlət Aqrar İnkişaf Mərkəzinin məlumatına görə, təkcə ötən il çiyələk sahələrindən 15 min 280 ton keyfiyyətli məhsul tədarük olunub və çiyələk satışından 6,8 milyon manat xalis gəlir əldə edilib. Məhsulun Ərəb ölkələrindən, İraq, Qazaxıstan və Belarusdan ixracı ilə bağlı sahibkarlara sifarişlər gəlib.
Cəlilabad DAİM-in mütəxəssisi Hafiz Kərimov qeyd edib ki, aqrotexniki qaydada suvarma və iqlim şəraiti əlverişli olarsa, gələn il çiyələk sahəsinə olan maraq daha da artacaq.
