Astara rayon icra hakimiyyətinin başçısı əhali ilə növbəti səyyar qəbulunu keçirib. Bu haqda məlumatı Cenublu.az bu gün, 12 avqust tarixində verir.
Qəzənfər Ağayev vətəndaşları Səncərədi kənd inzibati ərazi dairəsi üzrə nümayəndəliyinin Alaşa kəndində qəbul edib. Görüşdə rayonun inzibati orqanlarının, idarə və müəssisələrinin rəhbərləri iştirak ediblər.
Kənd sakinləri çıxışlarında kənddə əlavə elektrik transformatorunun qoyulmasına, pay torpağının yerinin göstərilməsinə, kənddə subartezian quyusunun qazılmasına köməklik göstərilməsini xahiş ediblər.
Səyyar qəbulda iştirak edənlərin arzu və təklifləri dinlənilib, məsələlərin həlli ilə əlaqədar rayonun təsərrüfat və xidmət sahələrinin rəhbərlərinə tapşırıqlar verilib.
İcra başçısı Alaşa kəndinin birinci Qarabağ və Vətən müharibələrində şəhid verməsini yüksək vətənpərvərlik nümunəsi adlandırıb, onları böyüdüb ərsəyə gətirən valideynlərə, dərs deyən müəllimlərə minnətdarlıq edib.
Alaşa kəndi ilə qonşu olan Qapıçıməhəllə kəndində Astaraçay üzərindəki körpünün tikintisi başa çatmaq üzrədir. Burada yeni gömrük sərhəd buraxılış məntəqəsi istifadəyə veriləndən sonra ərazidə böyük logistika mərkəzi tikiləcək.
