Astara rayonunun Ərçivan qəsəbəsində fəaliyyət göstərən tibb məntəqəsindən sakinlər narazılıq bildirirlər. Bu haqda məlumatı Cenublu.az bu gün, 23 aprel tarixində Baku TV-yə istinadən verir.
Söhbət Ərçivan Ailə Sağlamlıq Mərkəzindən gedir. Sakinlər burada olan şəraitsizlikdən neçə müddətdir ki, çətinlik çəkirlər.
“İçəri girəndə adam qorxur. Pəncərəsi yoxdur, döşəməsi isə pis vəziyyətdədir. Əsasən də qış aylarında çətinlik çəkirik. Uşaqları peyvəndə gətirəndə soyuğa görə paltarlarını çıxarmaq zülm olur”, – deyə sakinlər bildiriblər.
Ailə sağlamlıq mərkəzinin bölmə müdiri Məhəbbət Şəfəqqətov qeyd edib: “Sovet dövründə burada doğuş şöbəsi də olub, müəyyən mütəxəssislər də olublar. Yavaş-yavaş onların hamısı işdən çıxıb. 10 min əhaliyə biz xidmət edirik. Mərkəz 27 otaqdan ibarətdir, onlardan 8-i fəaliyyət göstərir. Şəraitimiz də o qədər yaxşı deyil. Əlimizdən gələni özümüz edirik. Xırda işləri görə bilirik. Qapının təmiri, elektrik naqillərinin təmiri, işıqlandırma sisteminin təmiri. Ancaq ondan çoxuna gücümüz çatmır”.
Məsələ ilə bağlı TƏBİB-dən bildirilib ki, mərkəz əsaslı təmirə ehtiyacı olan tibb məntəqəsi kimi qeydiyyata alınıb və maliyyə vəsaiti ayrıldıqdan sonra təmir işlərinə başlanılacaq. Əlavə olaraq, sözügedən tibb müəssisəsinin inzibati binası Ərçivan qəsəbə bələdiyyəsinin balansındadır. Müvafiq hüquqi tədbirlər görüldükdən sonra maliyyə vəsaiti ayrıla bilər.
