Astarada nəqliyyat vasitəsini dövlət nömrə nişanları olmadan idarə edən sürücülərin narkotik təsiri altında olduqları aşkarlanıb. Bu haqda məlumatı Cenublu.az bu gün, 22 fevral tarixində verir.
DİN-in mətbuat xidmətinin Lənkəran regional qrupundan verilən məlumata görə, Astara Rayon Polis Şöbəsinin dövlət yol polisi bölməsinin əməkdaşları rayon ərazisində xidmətdə olarkən "VAZ-2106" markalı avtomobilin sürücüsünü sonuncunun nəqliyyat vasitəsini dövlət nömrə nişanları olmadan idarə etdiyi üçün saxlayıblar.
Həmin nəqliyyat vasitəsini etibarnaməsiz, sürücülük hüququ olmadan idarə edən rayon sakini Ruslan Əliyevin narkotik vasitə qəbul etməsinə dair şübhələr yarandığından onun müvafiq tibbi müayinədən keçirilməsi təmin edilib. Müayinənin nəticəsinə əsasən, R.Əliyevin narkotik vasitədən istifadə etdiyi məlum olub.
Bundan əlavə, "VAZ-21063" markalı avtomobillə hərəkətdə olarkən Astara RPŞ-nin dövlət yol polisi bölməsinin əməkdaşları tərəfindən saxlanılmış digər sürücü, rayon sakini Ruslan İbrahimovun da nəqliyyat vasitəsini narkotik vasitənin təsiri altında idarə etdiyi müəyyən edilib.
Hər iki şəxs barəsində toplanmış materiallar hüquqi qiymət verilməsi üçün məhkəməyə göndərilib. Məhkəmənin qərarı ilə R.Əliyev 15 gün müddətində inzibati qaydada həbs edilib, R.İbrahimov barəsində isə digər inzibati tənbeh tədbiri seçilib.
