Astara rayonunda keçmiş bələdiyyə sədrini öldürən şəxs 16 il müddətinə azadlıqdan məhrum olunub. Bu haqda məlumatı Cenublu.az bu gün, 20 aprel tarixində Oxu.az-a istinadən verir.
Belə ki, sabiq sədri öldürən şəxs Astara rayonunun kəndində ailəsi ilə birgə yaşadığı yaylaq sahəsində təsərrüfat işləri gördükdən sonra heyvanları tövləyə qaytarmaq üçün meşəyə gedib.
Onun arvadı evdə tək qalan zaman sabiq sədr ona sataşıb, onunla intim münasibətdə olmaq istəyib. Meşədən qayıdan kişiyə arvadı baş verənləri danışıb. O isə qisas almaq niyyəti ilə sabiq sədri öldürmək qərarına gəlib.
Arvadına sataşdığı üçün mübahisə edib, əvvəlcədən götürdüyü balta ilə onun bədəninin müxtəlif nahiyələrinə zərbələr vurub. Sabiq sədr aldığı xəsarətlərdən hadisə yerində vəfat edib.
İstintaq orqanı tərəfindən öldürən şəxsə Cinayət Məcəlləsinin 120.2.4-cü (xüsusi amansızlıqla və ya təhlükəli üsulla adam öldürmə) maddəsi ilə ittiham elan edilib.
Məhkəmə zamanı məlum olub ki, sabiq sədr öldürən şəxsin ögey dayısı imiş və o, arvadı və 10 aylıq övladı ilə birgə onun yaylaq evində qalaraq qoyunlarına baxıb.
Hadisə günü sabiq sədr onun arvadının evdə tək olmasından istifadə edib. Təqsirləndirilən şəxsin həyat yoldaşı məhkəmədə bu ifadəni verib:
“Yoldaşımla dayısı həyətdə çay içdilər. Sonra yoldaşım qoyunları gətirmək üçün getdi. Dayısı isə həyətdə əl-üzünü yuyan zaman əynində olan köynəyi çıxardı, evə girdi. Qurulanmaq üçün dəsmal istədi. Yoldaşımın harada olduğunu soruşdum. Dedi ki,, qoyunların dalınca gedib.
Daha sonra o, üstümə gələrək dedi: “Yoldaşını nə edirsən? Mən buradayam”. Dedim: “Qızın yaşdayam, sən nə edirsən?” Boşqabı götürmək istəyəndə əlimdən tutdu. Boşqab yerə düşərək sındı. Sonra dodağımdan, boynumdan öpdü, əynimdə olan xalatın zəncirbəndini açmağa başladı. Müqavimət göstərmək istəsəm də, gücüm çatmadı. O fiziki cəhətdən güclü idi. Bir əli ilə ağzımı tutdu və yerə yıxdı. Əlimlə əlini tutaraq mane olmaq istəsəm də, gücüm çatmadı.
O xalatımın zəncirbəndini açdıqdan sonra boğazımdan öpməyə başladı. Həyətdən səs gəldi. O, səs eşitdikdə üstümdən qalxdı. Dedi: “Əgər yoldaşına bu barədə desən, səni rüsvay edəcəyəm”. Sonra digər otağa keçdi.
Yoldaşım görməsin deyə dərhal xalatın zəncirbəndini bağladım və on aylıq uşağımı götürüb, həyətə, bulağın başına düşdüm”.
Təqsirləndirən şəxsin həyat yoldaşı qeyd edib ki, əri evə gələndə ağladığını, üz-gözünün qızardığını görüb: “Məndən nə üçün ağladığımı soruşanda ona dayısının mənə sataşdığını, onun yaxşı adam olmadığını, buradan köçmək istədiyimi dedim. Yoldaşım bunu eşidib ağladı, biabır olmayaq deyə bu barədə heç kimə heç nə deməməyi tapşırdı. Sonra qoyunları ayırıb tövləyə salacağını deyərək evdən çıxdı. Təxminən 1 saat sonra gəlib qoyunları tövləyə saldığını dedi”.
Cinayət işinə Lənkəran Ağır Cinayətlər Məhkəməsində baxılıb. Məhkəmənin hökmü ilə Tahir 16 il müddətinə azadlıqdan məhrum edilib.
Qeyd edək ki, qətlə yetirilən şəxs keçmiş bələdiyyə sədri olub. Qətlə yetirilən zaman isə müəllim işləyirmiş.
