Astarada döyülmə faktı qeydə alınıb. Bu haqda məlumatı Cenublu.az bu gün, 10 avqust tarixində Azxəbər-ə istinadən verir.
Astara rayonunda 32 yaşlı Fəridə qayınanası Südabəyə (adlar şərti verilib – red.) xəsarət yetirib.
Fəridə və onun əri, 32 yaşlı Seymur barəsində İnzibati Xətalar Məcəlləsinin 157-ci (döymə) maddəsi ilə ittiham verilib.
Seymur isə arvadı Fəridəni döyməkdə təqsirli bilinib. Ər-arvad barəsində olan inzibati işlər ayrı-ayrı icraatlarda araşdırılıb və Astara Rayon Məhkəməsinə göndərilib.
Məhkəmə prosesində təqsirli bilinən Fəridə bildirib ki, 30 iyun 2023-cü ildə saat 22:00-da Seymurun ona xəyanət etməsinə görə qayınanası Südabə ilə aralarında mübahisə baş verib:
"Məni əvvəl qayınanam ağacla vurdu, sonra isə ərim başımı divara vurdu, təpiklə ayaq və diz nahiyələrimə vuraraq, məni döydü. Mən də ağacla qayınanamı vurdum”.
İş üzrə zərərçəkmiş Südabə deyib ki, son vaxtlar gəlini ilə aralarında mübahisələr artıb.
O qeyd edib ki, aralarında yaranan gərginlik zamanı gəlini onu döyüb. Zərərçəkmişin ifadəsinə görə, o və oğlu gəlini döyməyiblər.
Təqsirli bilinən Seymur qeyd edib ki, son vaxtlar arvadı ilə aralarında olan münasibətləri gərginləşib:
"Buna görə aramızda tez-tez mübahisə baş verirdi. Hadisə günü saat 22:00-da anam mənə zəng etdi. Evə gələndə anam ilə arvadımın mübahisə etdiklərini gördüm. Ancaq mən arvadımı vurmadım”.
Astara Rayon Məhkəməsinin qərarı ilə Seymur 15 gün müddətinə inzibati qaydada həbs edilib.
Fəridə isə 300 manat məbləğində cərimə olunub.
