Astara rayonunda bu il bal süzümü gecikib. Bu haqda məlumatı Cenublu.az bu gün, 16 avqust tarixində ARB Cənub-a istinadən verir.
Bal süzümünün gecikməsinin səbəbi havaların qeyri-sabit keçməsi və arıların nektar toplamağa gec çıxması olub. Lakin yağış təbiətə yaxşı təsir etdiyindən bal bu il daha keyfiyyətlidir.
Astara rayonunun Maşxan kənd sakini Əsabəli İbrahimov 25 ildir ki, ailəsi ilə birlikdə arıçılıqla məşğul olur. O, keyfiyyətli bal əldə etsin deyə arı ailələrini yaz və yay fəslində Masallı, Biləsuvar, Hirkanın cökə meşəsinə köçürür. Arıçının sözlərinə görə, keçən il arı məhsuldarlığı daha yaxşı idi. O bildirib ki, onun 100 arı ailəsi var və hər ailə bu il orta hesabla 4-5 və ya 6 kq bal götürə bilib.
Qeyd edək ki, növbəti bal süzümü sentyabr ayında olacaq. Bu il Astarada 200 tona yaxın bal tədarükü gözlənilir. Arı ailələri, əsasən, rayonun Miki, Siyaku, Şuvi, Hamoşam, Züngüləş və Maşxan kəndlərində peşəkar arıçılar tərəfindən ildən-ilə artırılır.
