Astara şəhərində bədbəxt hadisə nəticəsində yaşlı kişi ölüb. Bu haqda məlumatı Cenublu.az bu gün, 8 avqust tarixində Report-a istinadən verir.
Söhbət şəhərin Qum küçəsində yaşayan 81 yaşlı Əlisəfa İbrahimovdan gedir. Şəhərdə gəzərkən Əlisəfa İbrahimovun yüksək təzyiqdən halı pisləşib və o, yıxılmamaq üçün özünü işıqforda dayanan avtomobilə söykəyib. Bu zaman nəqliyyat vasitəsi yola düşüb və Ə.İbrahimov yerə yıxılıb. Ağır xəsarət alan kişi təcili olaraq Lənkəran rayon Mərkəzi Xəstəxanasının reanimasiya şöbəsinə yerləşdirilib. Həkimlərin sözlərinə görə, İbrahimovun xəstəxanada müalicəsinə baxmayaraq, yaxınlarının təkidi ilə o xəstəxanadan çıxarılıb və müalicəsinin evdə davam edəcəyi bildirilib.
Məlumata görə, bu səhər 81 yaşlı kişi evdə dünyasını dəyişib.
Meyit daxili və xarici müayinə olunması üçün Məhkəmə Tibbi Ekspertiza və Patoloji Anatomiya birliyinin Lənkəran rayon şöbəsinə təhvil verilib.
Faktla bağlı araşdırma aparılır.
