Avtomobilin maksimal sürəti saatda 240 kilometrdir, amma sürücüyə 266 km/saat sürətlə hərəkət etməsi barədə elektron protokol tərtib edilib. Bu haqda məlumatı Cenublu.az bu gün, 17 aprel tarixində Xezerxeber-e istinadən verir.
Hadisə Astara sakini Şamo Dadaşovun başına gəlib. Sürücü deyir ki, ona məxsus ''90-ZG-627'' dövlət nömrə nişanlı avtomobilə Ələt-Astara yolunun 199-cu km-dən saatda 266 kilometr sürətlə keçməsi barədə cərimə tərtib edilib.
Sürücüyə Astara Rayon Dövlət Yol Polisi Bölməsindən bildirilib ki, sürət həddini başqa sürücü aşıb. Amma xüsusi texniki vasitə Şamo Dadaşovun nəqliyyat vasitəsini çəkib.
Məsələ ilə bağlı Baş Dövlət Yol Polisi İdarəsindən bilidirildi ki, sürücüyə tərtib edilən elektron protokol araşdırılıb.
O da bildirildi ki, belə halla üzləşən sürücülər Baş Dövlət Yol Polisi İdarəsinin saytına yazılı şəkildə müraciət etsinlər. Bütün faktlar araşdırılaraq sürücüyə məlumat veriləcək.
