Astara rayon İcra hakimiyyətinin başçısı Qəzənfər Ağayev ucqar dağ kəndlərindən olan Asxanakəran kəndinin əhalisi ilə səyyar qəbul-görüş keçirib. Bu haqda məlumatı Cenublu.az bu gün, 15 sentyabr tarixində Astara ŞİH-yə istinadən verir.
İcra başçısı görüş zamanı qeyd edib ki, Asxanakəran nümayəndəliyinə daxil olan Asxanakəran, Motalayataq, Anbuba və Əzərüd kəndlərində yeni məktəb binaları tikilib, Taxtanakəran-Toradi avtomobil yolu asfaltlanıb, əvvəllər Lerik rayonu ərazisindən çəkilən yüksək gərginlikli elektrik xətti ləğv edilərək Siyaku kəndi ərazisindən yeni elektrik xətti çəkilib, Motalayataq həkim məntəqəsi üçün yeni bina inşa edilib, bir neçə avtomobil körpüsü tikilib. Hazırda Taxtanakəran-Toradi avtomobil yolunun çökən hissələrində əsaslı təmir işləri aparılmaqla Asxanakəran kəndinin mərkəzindən 2,5 kilometrlik məsafədə yerləşən Əzərüd kəndinə asfalt yolun çəkilməsinə başlanılıb.
Sakinlər görülən işlərlə yanaşı, kənddə olan elektrik və telefon xətlərinin yenilənməsinə, qəzalı vəziyyətdə olan dirəklərin dəyişdirilməsinə, yeni elektrik transformatorunun qoyulmasına, torpaq sürüşməsi nəticəsində zədələnmiş fərdi yaşayış evinin təmirinə, Vətən müharibəsi iştirakçısının özünüməşğulluq layihəsi çərçivəsində mal-qara ilə təmin edilməsinə köməklik göstərilməsini xahiş ediblər.
İcra başçısı vətəndaşlar tərəfindən verilən təkliflərə və qaldırılan məsələlərə münasibət bildirərək, həlli barədə aidiyyəti üzrə tapşırıqlar verib.
