Tarixə Aprel döyüşləri və ya Dördgünlük müharibə kimi yazılan bu hərbi münaqişə 2016-cı il aprelin 1-dən 2-nə keçən gecə Azərbaycan Silahlı Qüvvələrinin və Ermənistanın Qondarma Dağlıq Qarabağ Respublikasındakı hərbi birləşmələri arasında baş verib.
Aprel müharibəsində qəhrəman əsgər, gizir və zabitlərimiz təcavüzkar Ermənistan ordusuna ağır zərbələr endirərək 2 min hektardan artıq ərazini işğaldan azad ediblər.
Aprel döyüşlərindən sonra – may ayında Ermənistan və Azərbaycan prezidentləri münaqişənin tənzimlənməsi üzrə ATƏT-nin Minsk Qrupuna həmsədrlik edən ölkələrin rəsmilərinin iştirakı ilə Vyanada görüşüblər, həmçinin iyunun 20-də Sankt-Peterburqda Rusiya Prezidentinin iştirakı ilə üçtərəfli danışıqlar keçirilib. Görüşlərdə münaqişə bölgəsində etimad tədbirlərinin möhkəmləndirilməsi, insidentlərin araşdırılması mexanizmlərinin yaradılması, ATƏT-nin fəaliyyətdə olan sədri ofisinin genişləndirilməsi haqqında razılıq əldə edilib.
Döyüşlər zamanı Azərbaycan Silahlı Qüvvələrinin 88 hərbi qulluqçusu şəhid olub, 1 “Mi-24” helikopteri vurulub, 1 tank mina partlaması nəticəsində məhv edilib. Döyüşlərdə ermənilərə məxsus 30 tank, 15-ə qədər artilleriya qurğusu və gücləndirilmiş mühəndis birləşmələri məhv edilib, 320 əsgər öldürülüb, 500-dən çox əsgər yaralanıb.
